Þessar flottu köngulóar hrekkjavökubollakökur eru tilvaldar í baksturinn fyrir hrekkjavökupartýið.

Kökurnar eru sígildar súkkulaðikökur með bragðgóðu kremi og silkimjúkar. Valgerður notar AB mjólkina okkar i þær en að hennar sögn þá nær hún með hennni góðri mýkt og kökurnar lyfta sér betur. Smjörkremið er klassískt með appelsínugulum lit og köngulærnar gerðar úr svörtum fondand sem Valgerður segir virkilega einfaldar að gerð. Þetta séu 4 bogar, tveir stærri, tveir minni sem vísa á móti hvor öðrum og búkurinn sé svo bara minni og stærri kúla skreytt saman og mótuð.

Gleðilega hrekkjavöku!

Kökurnar

Hráefni sem þú þarft í kökurnar: 

1 bolli hveiti

1 bolli sykur

1/3 bolli kakó

1 tsk lyftiduft

1/2 tsk matarsódi

1/2 tsk salt

1 stórt egg

1/2 bolli ab mjólk

1/2 bolli jurtaolía

1 tsk vanilludropar

1 bolli heitt vatn

Aðferð:

  1. Byrjuð á því að hita ofninn í 175°C og taka fram bollakökubakka (úr málmi) og raðið í hann bollakökuformum.
  2. Setjið hveiti, sykur, kakó, salt, lyftiduft og matarsóda í skál og hrærið með písk.
  3.  Bætið við eggi, ab mjólk, olíu, vanilludropum og heitu vatni saman við og hrærið þar til deigið er samlagað.
  4. Setjið í bollakökuformin til rúmlega hálfs. Bakið í 20-22 mín, fer eftir ofnum.

Kremið:

Hráefni sem þú þarft í kremið: 

200 g smjörlíki mjúkt

100 g smjör mjúkt

500 g flórsykur

2 tsk vanilludropar

1-2 msk rjómi

Appelsínugulur matarlitur (t.d. gellitur frá Wilton)

Aðferð:

Hrærið smjör og smjörlíki vel saman, bætið þá flórsykri, rjóma og vanilludropum saman við og þeytið vel þar til létt og ljóst. Bætið þá við matarlit og þeytið áfram.