Jarðarberjarúlluterta

Jarðaberjarúlluterta sem er svo dásamlega góð.

Þessi jarðaberjarúlluterta er ættuð af bananarúllutertunni sem mörg okkar muna eftir úr æsku. Að minnsta kosti er bananarúllutertan ein sú eftirminnilegasta úr minni æsku. Mér fannst hún alveg óhemju góð og það vildi svo heppilega til að mömmu og ömmu fannst mjög einfalt og fljótlegt að gera hana, svo ég fékk hana ansi oft.

Þessi jarðaberjarúlluterta gefur bananarúllutetunni ekkert eftir. Ég blandaði nýja íslenska jarðaberja jógúrtinu frá Örnu út í rjómann og skar svo líka jarðaber í fyllinguna. Útkoman er stórkostlega góð, ekki eins sæt og bananatertan og örlítið ferskari.

Þessi rúlluterta hvarf á augabragði heima hjá mér þegar ég bauð upp á hana um daginn, og ég vona að hún eigi sömuleiðis eftir að gera það hjá þér.

Uppskrift og myndir frá Lindu Ben.

Innihaldsefni

3 egg

200 g sykur

1 msk hveiti

30 g kartöflumjöl

1 tsk lyftiduft

2 msk kakó

2 msk flórsykur

2 msk frostþurkað jarðaberjduft (má sleppa og er bara notað sem skraut í uppskriftinni)

Fylling

200 ml rjómi

170 g íslensk jógúrt úr íslensku jarðaberjum frá Örnu Mjólkurvörum

100 g jarðaber

Aðferð

Kveikið á ofninum og stillið á 230°C, undir og yfir hita.
Þeytið saman egg og sykur í nokkrar mínútur þar til blandan er orðin létt og ljós.
Blandið saman hveiti, kartöflumjöli, lyftidufti og kakó saman í aðra skál og sigtið síðan yfir eggjablönduna. Blandið öllu saman með sleikju.
Brjótið smjörpappír ofan í form sem er 25×40 cm stórt (eða sambærilega stórt), hellið deiginu ofan í formið og bakið i 7 mín þannig að kakan sé bökuð en samt ennþá mjúk. Leyfið kökunni að kólna alveg.
Takið aðra örk af smjörpappír og sigtið yfir hana flórsykur, ég notaði einnig frostþurkað jarðaberjaduft en því má sleppa. Hvolfið kökunni ofan á smjörpappírinn með flórsykrinum, takið smjörpappírinn sem kakan var bökuð á, varlega í burtu.
Þeytið rjóma og bætið jógúrtinu út í, blandið saman og smyrjið ofan á kökuna. Skerið jarðaber í sneiðar og raðið ofan á rjómann.
Rúllið kökunni varlega upp frá langhliðinni með smjörpappírinn undir kökunni til stuðnings.
Færið kökuna á kökudisk og skreytið með jarðaberjum.